يبدو أن أحلام لوسيد لن تدعني أحلم كإنسان عادي، هذه المرة أعلم أنه حلم من البداية، من المستحيل أن يكون حقيقة فأنا لا أرتدى الزي الإنجليزي الخاص بالصيد في الغابات كما أني لم يسبق لي دخول حديقة بمثل هذه الروعة لا بد أني في مكان أوروبي.
حسنا، إذا كنت أعلم أنه حلم فربما يمكنني الإستفادة منه في تحقيق بعض خيالاتي دعني أفكر بعض الأفكار الإيجابية وأحولها إلى حقيقة ربما بحيرة وسط الحديقة أو أناس احبهم، أغلق عيني بعض الشيئ كنوع من التركيز لتحقيق الأمر لكن لا شيئ يحدث، مازلت جالسا على مقعد الحديقة الحديدي أسفل الشجرة الضخمة أمام أحواض الورد المتفتح دون تغيير ولا شيئ يدل على وجود أناس بالمكان.
اممم ربما لو ظللت أحدق في الزهور سأجعلها تتحول إلى وجوه مضحكة، أبدأ في التحديق لكن الغريب أن الورود بدأت في الذبول والموت، أنا حقا أفشل في الإستفادة من ذلك الحلم يبدو أن كلام الكتب حول إمكانية التحكم في أحلام لوسيد جزء من هراء كتب الأحلام، الأمر يتحول لملل أنا شبه محبوس في هذا الحلم.
أدور حول الشجرة الضخمة محاولا إستكشاف المكان لكن لا أرى شيئا، فأقرر تسلق الشجرة وأثناء الصعود اسمع صوتا يسألني ماذا أفعل ليختل توزاني فجأة وأقع على الارض فيما يتضح صوت فتاة جالسة على المقعد وهي تضحك من الموقف.
- واضح إن الوقعة عجبتك ايه رأيك تجربيها بنفسك.
- لا شكرا أنا كفاية عليا هبلك
- انا أهبل؟؟، طب على الأقل أنا مش لابس هدوم جدتي زيك، انتى مشيتي في الشارع بالفستان الأثرى ده
- قال يعني انت اللى لابس على الموضة، شوف لبسك قبل ما تعلق وكمان خد بالك انه حلم يعني عقلك هو اللى بيختار.
- انا مش فاكر اني عقلي تخيل واحدة عبيطة زيك
- انت هتقعد الحلم تغلط على فكرة انت ده كله من دماغك فمتقعدش تجادل وتعال اقعد جنبي
- اديني قعدت عاوزة ايه
- انا مش عاوزة ، عقلك اللى عاوز
- وعاوز ايه عقلي
- بص يا سيدي في شوية حاجات معلقة في دماغك محتاجين نخلص منها
- حاجات ايه
- تجارب قديمة
- وانا اخلص منها ليه
- عشان تبدأ فصل جديد في حياتك
- ومين اللى قال اني عاوز اخلص منها انا بدأت فصول كتيرة في حياتي من غير ما اخلص منها
تبتسم الفتاة بشكل رائع يُذكرني بشخص ما
- دبشليم انت عارف ايه المشكلة بلاش عناد عمرنا ما هنوصل لحاجة ليه مش بتنسى الموضوع القديم
- اه الموضوع القديم، تعالي نفكر كده ليه متقفلش ليه ليه، يمكن لأنه مخلصش، يمكن لأنه لغاية دلوقتي كل ما افتكره بكون غضبان، يمكن لأنه لغاية دلوقتي عقلي موصلش لتفسير للى حصل، يمكن لاني مستني اعتذار من اللى كان السبب فيه من الأول، يمكن لان العقل اللى بعتك كان غبي لدرجة انه وقع في الحفرة دي.
صوت الفتاة مضطرب من صوتي الهادر وعلامات الغضب على وجهي: ساعات بيكون في حاجات ملهاش تفسير أو انت مش متقبل تفسيرها، غالبا انت عارف انه كانت غلطة وانت كملتها لان غرورك فهمك أنك ممكن تغير المعادلة، ايه رأيك ندفن الموضوع ده متنساش انه حاجة زي دي ممكن تعميك عن حاجات أهم ناس مهتمة بيك.
- وتفتكري ازاي أدفن موضوع زي ده
- ايه رأيك تكتب رسالة تودع فيها الموضوع القديم.
- تفتكري حتة رسالة ممكن تحل الموضوع
- انا بقول نجرب
- وبعدين
- نحطها في إزازة ونقفلها كويس ونرميها في البحر
- ماشي اما نشوف
أحضر ورقة وقلم وأبدأ في الكتابة
- اتفضلي الرسالة
- بالسرعة دي
- اه أصلي عارف اكتب ايه
تفتح الفتاة الرسالة وتقرأ ما فيها وتتحول ملامحها إلى غضب وتلقي الورقة على الأرض فيما أحاول إيقاف ابتسامة تزحف على وجهي بطريقة ماكرة.
- انت مصر على عنادك مفيش فايدة من الكلام معاك
- انتي ليه بتشوفي النص الفاضي من الكوب يعني انا خليتك تتكلمي في موضوع خاص جدا وسمعت كلامك وكتبت رسالة المفروض انك تقدري اني مهتم بكلامك واسمحيلي عندك ابتسامة جميلة بتفكرني بحد بحبه.
- دبشليم انت غبي وأوعدك أنه اللى بفكرك بابتسامته هيكون سبب مشاكلك
- متقلقيش انا المرة دي مستعد أظن اني عرفت ليه لابس لبس الصيد ده، المرة دي انا هكون بسلاحي ومش هكرر الغلطة
- هنشوف
- (بلا مبالاة) خلينا نشوف
ليست هناك تعليقات:
إرسال تعليق