حلم لوسيد (6): صالة 1

المكان: المطار
المشهد: دبشليم جالس على مقعد أمامه حقيبة يد صغيرة معطيا ظهره لمندوبة عقله السامي


صوت الإذاعة الداخلية يدوى عبر الصالة "على السيد دبشليم الإسراع بالتوجه إلى مخرج 28 للحاق بطائرته"

- انت هتمشي فعلا
- معرفش انا بحاول لسه مش عارف هعرف امشي ولا لا

- طب هتمشي ليه ؟
- عارفة قصة طروادة



- ايه علاقة ده بسؤالي
- بيقولك ان ملك المدينة دي كان بيفتخر بأسوار مدينته الحصينة وانها قهرت كتير من الغزاة وكان اخرهم الاغريق اللى قعدوا 10 سنين مش عارفين يقتحموا المدينة

- اممم، حواديت وماله، وبعدين
- الاغريق ابتكروا فكرة حصان خشب يخبوا فيه الجنود ويعملوا نفسهم مشيوا وبعد ما اهل طروادة يطمّنوا الجنود يفتحوا الابواب ويدخلوهم.

- طب وانت ايه علاقتك بالقصة دي
- انا عندي حصان برضه دخل براسه المشكلة انى عارف انه غلط انه يدخل القلعة بس مش عارف اوقفه والأنيل ان اللى جواه ممكن يهد القلعة اللى بقالها سنين في ثانية.

- بطل شغل الحواديت الرمزية دي انا ممكن افهمها بس غيري مش هيفهم انت بتقول ايه
- والله انا مش بكتب عشان الناس تفهم من امتى اصلا انا بيفرق معايا الناس تفهم انا بكتب ايه

- بس انا حذرتك مش كده انت اللى ركبت دماغك
- انتي سخيفة على فكرة واللى بعتك عقل عاوز الضرب لانه السبب في كل ده

- تفتكر هتنجح في خطتك
- الموضوع ده مش انا اللى اتسئل فيه المفروض اللى بعتك هو اللى يجاوب بس الواضح انه هيخذلني لانه بعتك

- ( بنبرة تصيد)  قصدك ايه
- قصدي انه لو كان ناوي على خير مكنش بعتك انتي بالذات كان بعت اي حد تاني
- ايوة عشان تموته
- الموضوع مش ناقص خناقات اخلصى
- طيب طيب

- طب والناس اللى هتسيبهم هيعملوا ايه وانت فاهم قصدى مين بناس
- الناس مهما كانت درجة قربهم بينسوا شوية وهينسوا هتتفاجئي بقدرة الناس على النسيان بسرعة وافتكر احنا عارفين انه مفيش فايدة  في الثقة في الناس او الاعتماد عليهم.
- يا راجل
- وبعدين :@


تقف المندوبة وتمشي لتقف أمام دبشليم بفستان رائع وعطر ساحر ينساب داخل روح دبشليم بطريقة قاتلة فيما يبدو شعرها رائع في تصفيفة ذيل الحصان، تنحني المندوبة نحو دبشليم

- دبشليم يا فيلسوف الغبرة انت ممكن تمشي دلوقتي بس انت راجع ده أكيد، عارف ليه
- ليه
- لان القصة مخلصتش وانت عمرك ما سيبت حدودتة من غير ما تحطلها نهاية حتى لو كنت عارف انها غلط
- المرة دي لا انا مش ناوي احط نهاية
- هتهرب ؟
- انا عمري ما هربت من موقف حتى لو عارف اني في موقف زفت فيه بس احيانا انك تسيب كل حاجة ورا ضهرك بيبقى احسن حل خصوصا لما تكون عارف ان الوحيد اللى عنده مشكلة هو انت مش الناس التانية.

تمشي المندوبة مبتعدة وهي تكرر "انت راجع هستناك عشان اشمت فيك"
وتبدأ في الغناء لفيروز

بكرا برجع بوقف معكن اذا مش بكرا البعدو أكيد

أنتو أحكوني و أنا بسمعكن حتى لو للصوت بعيد

مقاطعا " انت جميلة جدا النهاردة"

تضحك قائلة "مش قولتلك" وتعاود الغناء

بلا موسيقتنا الليلة حزينة بلا غنية الليلة بتطول

كل ليلة بغني بمدينة و بحمل صوتي و بمشي عطول


يراقب دبشليم مندوبته وهي تمشي مبتعدة حتى تختفي ثم ينظر للجهة الأخرى حيث تضيئ لافتة مخرج 28 " حسنا انا قادم ايها المخرج لعلك في نهايتك ضوء"