سيناريو

نهار خارجي

(أرض مخضرة بجانب ضفة نهر شبه متجمد يقف أمامه رجل 1 يفرك يديه لبث الدفء فيهما مع صوت مياه جارية في الخلفية، بينما تسير فتاة 2 باتجاهه لتقف بجانبه وتسير الكاميرا خلفها وتتوقف حركتها مع وقوف الفتاة بجانب الرجل).

2: تفتكر ايه احتمالاتك السنة دي؟

1: ضعيفة، وحشة جدا

2: هتخسر

1: الخسارة متوقعة، دايما في خساير، الحياة عبارة عن خساير مستمرة الفكرة إنك تخليها مش مرة واحدة وتستحملها

2: طب ايه المشكلة؟ 

1: المشكلة إن خساير السنة دي هتبقى كبيرة، وأنا زهقت.

2: كام واحد؟

1 (ينفخ في يديه): 3 - 4 

2: يااه للدرجة دي

1: احتمال تكون أسوأ سنة، الخساير من كل الجهات

2: استعديت للخسارة؟

1: عاوزة الحق أنا المرة دي مش مستعد للخسارة خالص، مفيش طاقة، الموضوع بالنسبة لي عبث، هبل

2: إنت السبب في الخسارة دي؟

1: المشكلة إنه مش أنا دي اختيارات الناس اللي هخسرهم، اختياراتهم بتقول إنه نهاية الخط، خلاص، بح، وأنا مينفعش أفضل مع حد مش عايزني أو مش حاططني في نفس الترتيب بأولوياته زي ما أنا حاطه ولما  حاولت احطهم في نفس الترتيب زعلوا، عشان كده بقولك عبث، الوضع معصبني.

2: بس انت عارف انه اللي حواليك مش هيفضلوا دايما موجودين

1: عارف ودايما متقبل ان دي الحياة مفيش حاجة بتفضل على حالها بس كبني ادم حقي اعترض شوية ادبدب على الأرض

2: بس انت مش مبين أي حاجة وبارد كالعادة مفيش مشاعر 

1: مش مبسوط هي دي المشاعر اللي اقدر اقولها دلوقتي

2: تفتكر في أمل؟

1 (يبتسم): دايما، بس دي مشكلة برضه بتخليني أكلم نفسي وأنا ماشي، عارفة....

2( مقاطعة): بس بس مادام فيه أمل بطل كلام وفلسفة ووجع دماغ إنت لسه مش شايف نفسك خسران وفكرك كله انه مش هيحصل.

1(ينظر لها في صمت): ....

2: ايه؟

1: أبو شكلك

2: أحسن من شكلك

صمت تام وكلاهما ينظر أمامه يراقب المياه