السبت
محادثة لمدة 9 ساعات، موضوع مش فاكر اخر مرة عملته امتى بس من غرابة الوضع والاكتشافات اللى بكتشفها عن البشر أدركت قد ايه إحنا بائسين مهما أظهرنا قوة، بشكل عام المحادثة رغم إنها كانت لطيفة بس فكرتني بذكريات كنت فاكر إنها اختفت مش مشكلة أنا اتعلمت الدرس كويس ومش هتتكرر الغلطة، معاد الدكتور واسئلة غريبة وادوية وكلام عن الشباب اللى مش مهتم بصحته وطبعا والدي ما صدق، منور يا دوك -_- .
الأحد
بداية أسبوع الشغل والسخافات المعتادة من الخليج مواعيد الأدوية 4 كل واحد ليه معاد وانا لازم اخد بالي، السخيف انه المرض كان فرصة للاهل لفرض السيطرة عليا الاكل الشرب الراحة كل حاجة العزلة والخصوصية بقت سداح مداح، عودة المحرر الملعون، المدير لسه متكلمش في موضوع الشغل الجديد.
الاثنين
بداية مش لطيفة بعرف حاجات بتضايقني مع انه المفروض متضايقش كل واحد حر في حياته ومفيش حاجة تربطني في حد بس مجرد معرفة انه في شيئ بيحوم غايظاني وده دفعني للتفكير في موضوع ليه اتخلق القلب والعقل ما كفاية واحد يقرر بعقله ونخلص من القرف ده بدل الحيرة والتجارب السخيفة.
الثلاثاء
ثالث يوم من اخد الدوا ومفيش تحسن بالعكس حاسس انه الوضع أسوأ ايدي بترعش بشكل سخيف غير مشاكل تانية كأني داخل على System crash وده معصبني اكتر، مزيد من المعلومات اللى تعصب انا بعرف حاجات اكتر من اللازم مش محتاج اعرفها وناس تانية تقفش مش عارف ليه، خلصت الشغل بدري ومكنتش مصدق والحمدلله طلع ظني في محله واتطلب مني شغل بليل وذلك لأن العالم لم يكن يوما مثاليا، المدير اتكلم عن الاستعداد للشغل الجديد، دوا جديد اتضاف 5 في عين اللى ما يصلي على النبي، نوم ساعتين، الرعشة لسه موجودة الوالدة شايفة انه اعصابي تعبت من الشغل.
ملحوظة - ان تكون والدتك دكتورة او صيدلانية معناه تشخيص حالتك الصحية 24 ساعة في اليوم وفي الاخر انت مريض حتى لو قاعد تتنطط قدامهم.
الاربعاء
يوم سخيف ......
الخميس
خروجة لطيفة بعد يوم قرف في الشغل ربنا يستر
الجمعة
مراجعة احداث الاسبوع خلتني ادرك اني في موقف مكنتش احب انه يتكرر بس مش مشكلة المرة دي انا مختلف
السبت
نهاية سهرة الجمعة السبت الصبح كانت منطقية رغم تخييب امل ناس لكن ده كله للمصلحة العامة واكيد الناس دي هتشكرني بعد كده على اللى عملته المهم انه يكون اقتنعوا، زيارة الدكتور المرة دي كانت مثمرة ضفنا أدوية جديدة للقايمة ولغينا حبة من القدام الظاهر انه بيجرب فيا الادوية بعد ما لقى انه مفيش تحسن
ليست هناك تعليقات:
إرسال تعليق