ساعات بفتكر إني فقدت الذاكرة ومش فاكر أي حاجة بس الحقيقة انه دماغ الواحد بتحاول تخليه مركز بانها تخفي ذكرياته القديمة وعند أول موقف تلاقي الذكريات بتسيل زي العسل من دماغك ببطء وتقيلة، ده اللى حصلي لما جابوا سيرتك افتكرت الاسبوعين اللى قضتهم من اجازة اخر السنة عندكم لما كنت عاوز اركب عجلة ومش عارف خصوصا ان عجلة اخوكي كانت كبيرة وصعب اركبها وانا صغير إلى جانب اني كنت خايف اقع اتعور ساعتها كنت بكلم اسامة بقوله وهو مكسل فانتي اتطوعتي وقولتيلي انا اعلمك صحيح اني كنت محرج بس الصراحة رغبتي في اني اتعلم ركوب العجلة خلتني مش فارق معايا وطلعنا بالعجلة انتي تشرحيلي ازاي ابدأ وانا مش عارف وكل مرة اقع من قبل حتى ما ابدل حتى انه اسامة جه يتفرج ويضحك شوية ويساعد شوية وانا قعدت اضحك معاكم لغاية ما جت اللحظة وعرفت اطلع بالعجلة وادوس في نفس الوقت وحصلت الحادثة المسخرة اني قعدت ابدل من غير ما امسك الجادون ولقيت العجلة لوحدها داخلة ناحية المجاري وانا قمت بكل فهلوة ناطط من عليها وسايبها ماشية لوحدها ناحية مصيرها البائس ساعتها قعدنا نضحك احنا الاتنين واسامة اتغاظ لاني وقعت العجلة في المجاري واضطر هو ينضفها بس ده مفرقش معايا لانه ساعتها كنت انا انتصرت واتعلمت ركوب العجلة، ياه كأن الموضوع ده حاصل من قريب مش من اكتر من 10 سنين حتى لما قابلتك في العيد وفكرتك بالحكاية دي قولتيلي "ياه انت لسه فاكر ده انا كنت ناسية".
فاكر كمان قرايتنا لروايات الجيب رجل المستحيل وملف المستقبل وازاي كنا بنقعد نبدلها لما اكون في الشرقية صحيح انتي رجعتيلي اخر قصة خدتيها مني لما كنت في الشرقية، تلاقيكي مش فاكرة على العموم مش مهم مع انك عارفة انه الكتب عندي أغلى من البني ادمين وابتسمت لما افتكرت انك قولتيلي انك جبتي روايات عبير ورمتيها من غير ما تكملي قرايتها بسبب الكلام اللى فيها، ولما كنت تقعدي تلعبي مع ايمان وهي صغيرة وتضحكوني بمنظركم، وكمان فاكر شعرك البني المدهب اللى كنت بتعمليه ديل حصان ولما تخلعي النضارة ونتريق عليكي انا واسامة وتضحكي وتردي علينا ونقعد نضحك كلنا.
اخر عيد كنتي عمالة تردي على ايمان اللى بتقول انها بتعمل المواعين وانتي مبتعمليش حاجة طبعا انا عارف انها مفترية لاني فاكر ايام كنا بنقعد فاضيين في البيت ونقرر نعمل عشا محترم ونقطع البطاطس ونعمل الفول والبيض بانواعه وانت بتقلي وتغسلي المواعين بعد ما نكون جالنا انا واخواتك تخمة من العشا.
لحد امبارح انا مكنتش مصدق لغاية ما توأمي بعد ما رجع من السفر وواقفين في المطبخ بعمل لمون قال "خلاص مبقاش في شوشو" تصدقي انا حسيت بانه حاجة طبقت على صدري اكتر من الأول كل التفاصيل محستش فيها بحاجة إلا الجملة دي.
الله يرحمك يا شوشو يا رب اجعل مثواها الجنة برحمتك وصبر أهلها واجمعنا بيها هناك انا مش زعلان انك موتي اكيد ربنا شايلك حاجة احسن وبحمد ربنا انك كنتي في حياتي حتى لو مكنتش لحقت اعرفك اكتر.
ليست هناك تعليقات:
إرسال تعليق